Ein kurzes Intermezzo "vo dr Gass" ...

Die Basler Fasnacht 2003 ist eine politische Fasnacht ,...


Foto: JuM Basler Fasnacht 2003

Zrugg in Bus(c)h


Hiigrisse zwische Mickey Mouse und Macht
isch gschwind em Bresidänt sy Mainig gmacht:
«E Grieg im Irak wääri gar nit gspunne.
Hett nit my Babbe au scho aine gwunne?
Well, it?s my will, die weschtlig Wält z erleese
vom Evil und dr Aggse vo de Beese.»
Syt denne gheert me, s isch bigoscht makaber,
daag-dääglig fundamentalistischs Glaaber
vom GeeWee Bush mit Inbrunscht bresentiert,
dass es aim als wie meh an Ranze friert.
Es schyynt, s gilt fir dr Bush als elft Gebott:
«Dr Gueti griegt zletscht alles, was er wott.»
Und drum loot är, zem s Eel im Irak z griege,
als letschti Konsequänz no d Bomber fliege.
Derbyy isch s Bäch, wenn s Zivilischte butzt.
Denn grächt isch numme, was aim sälber nutzt.
So zaigt sich hitte aimool meh im Golf:
Der Mensch, der ist dem andern Menschen Wolf.
Lälli



Das isch dr Cowboy Bush, dr Sohn vom Alte,
wo G.W. het und G.W. haisst,
wo sich jo nur mit Zittere und Bschysse
und dangg em Wirtschaftsfilz sym Gäld
dä Job het kenne under e Naagel rysse
als Guru vo dr neye Wält.
Dr Bush isch nit dr hällscht. Doch s kunnt no schlimmer.
Die maischte in dr Neye Wält
(wo mir so uffejuuble) sinn no dimmer
und hänn nit gmerggt, wo s wirgglig schällt.
Si fiehre wie globali Bolizischte
sich alli mitenander uff.
Derbyy wäärs gscheyter, wenn si wurde mischte
bi sich dehaim in ihrem Buff.
Är ka sy Sauerey im Land nit leese,
drum konstruiert dr G.W. Bush
mit syyne Speezi zämme d «Aggs vom Beese»
und startet in e näggschte Pfusch.
Nooch Vietnam, vor Korea, will me jetze
die junge Lyt zem Landeswohl
in fäärne Noochen Oschte aabehetze,
in edle Gryzzug firs Petrool.
Dr Bresidänt dänggt an die neggschte Wahle
und loost uff niemerts und blybt stuur
bim Motto: Zrugg in Bus(c)h wie d Kannibale.
Das isch halt ebe syy Kultur.
Opti-Mischte



Nit jeden Ami isch e Frind.
Dailsch nit syy Mainig, bisch e Find.
S het d Bush-Regierig allem aa
au nit an alle Gfalle ghaa.
Ganz bsunders nit an dääne Frinde,
wo vo Europa ääne zinde.
Wär Frind und Find nit drenne kaa
kaa d Finger lyycht verbrenne draa.
Dr alt Bush het kai Schimmer ghaa,
dr Sohn isch fascht no schlimmer draa,
drumm zaigt denn mit dr Zyt s Brogramm:
E Nuss fallt halt nit wyt vom Stamm.
VKB

Trotz allem han y d Schotte lieber
als alli US-Waffeschieber.
Drum lehr y wäg däm Lumpepagg
statt Uncle Sam dr Duudelsagg.
Jungi Märtplatz